Madagaska: Wafungwa 50 wa China wahamishiwa China baada ya kupatikana na hatia ya ulaghai mtandaoni

Raia hamsini wa China waliohukumiwa nchini Madagaska kwa ulaghai mtandaoni waliondoka katika taifa hilo la kisiwani mnamo Septemba 7. Wakiwa wameshikiliwa katika Gereza Kuu la Avaradrano, walihamishiwa China kutumikia kifungo chao kilichobaki, Wizara ya Sheria ya Madagaska ilitangaza.

Hukumu walizopewa zinaanzia kifungo cha miaka miwili hadi kumi. Uhamisho wao ni hatua ya kwanza ndani ya mfumo wa ushirikiano wa kimahakama kati ya Madagaska na Uchina, unaolenga hasa kuimarisha mapambano dhidi ya uhalifu wa kimataifa.

Kulingana na mamlaka ya Madagaska, operesheni hii ilifanywa kwa usaidizi wa Interpol na Ubalozi wa China nchini Madagaska. Pia ilihusisha Wizara ya Usalama wa Umma, ambayo ilikuwa na jukumu la kuhakikisha usalama wa operesheni hiyo.
Kundi hilo liliondoka Madagaska kuelekea China, na kusimama huko Addis Ababa, Ethiopia.
Mamlaka zinasema kwamba operesheni hiyo ilifanyika kwa kufuata masharti ya kisheria na taratibu za kimahakama zinazotumika.

Pia zinaonyesha kwamba uhamisho huu wa kwanza haupaswi kuwa wa mwisho: mawimbi mengine ya kuwarudisha wafungwa makwao yamepangwa ndani ya mfumo wa ushirikiano huu.
Hatua hii inakuja wiki chache baada ya uamuzi wa Baraza la Mawaziri la Malagasi. Mnamo Agosti 4, serikali iliidhinisha kujiunga kwa Madagaska, kufuatia pendekezo la China, kwa utaratibu wa kimataifa uliowekwa wa kupambana na ulaghai kwa kutumia mawasiliano ya simu na majukwaa ya kidijitali.

Kupitia muunganiko huu, Antananarivo na Beijing zinakusudia kuimarisha ushirikiano wao katika kukabiliana na mitandao ya ulaghai inayofanya kazi nje ya mipaka.

Djamila Kambou